नायगांव / सय्यद जाफर
नायगांव तालुक्यातील कुंटूर येथील चौक परिसरात सुरू असलेल्या अवैध ताडी (शिंदी) व देशी दारू विक्रीच्या दुकानांवर राज्य उत्पादन शुल्क विभागाच्या भरारी पथकाने शनिवारी (दि. ७ मार्च) सायंकाळी अचानक धाड टाकून कारवाई केली. या कारवाईत अवैध धंदा करणाऱ्या तिघांविरुद्ध कारवाई करण्यात आली असून ताडी (शिंदी) व देशी दारूचा मुद्देमाल जप्त करण्यात आला आहे.
मिळालेल्या माहितीनुसार, कुंटूर येथे काही ठिकाणी अवैधरित्या देशी दारू, विदेशी दारू तसेच बाहेरून आणलेल्या पाकिटातील ताडीची खुलेआम विक्री सुरू असल्याची तक्रार स्थानिक नागरिकांनी राज्य उत्पादन शुल्क विभागाकडे केली होती. या तक्रारीच्या अनुषंगाने दि. ७ मार्च रोजी सायंकाळी साडेपाचच्या सुमारास उत्पादन शुल्क विभागाच्या भरारी पथकाने कुंटूर येथे धाड टाकली. या पथकात दुय्यम निरीक्षक आर. एम. राठोड, शिवाजी कोरनुळे, गिरीश भालेराव तसेच महिला कॉन्स्टेबल घुगे यांचा समावेश होता. पथकाने कुंटूर येथील चौक परिसरातील अवैध ताडी व देशी दारू विक्रीच्या दुकानांवर कारवाई करत शिंदीचे दोन पोते तसेच देशी दारूचे बॉक्स जप्त केल्याची माहिती स्थानिक नागरिकांनी दिली.
दरम्यान, या कारवाईसंदर्भात अधिक माहिती घेण्यासाठी पथक प्रमुख आर. एम. राठोड यांच्याशी दूरध्वनीवर संपर्क साधला असता त्यांनी सविस्तर माहिती देणे टाळले. मुद्देमालाची अचूक संख्या तसेच ताब्यात घेतलेल्या व्यक्तींबाबत माहिती त्यांनी दिली नाही. तसेच ते एका खाजगी कार्यक्रमासाठी बाहेरगावी असल्याचेही नमूद केले. मात्र एक ताडीच्या आणि दोन अवैध देशी दारू विक्रीची अशी तीन दुकाने चालविणाऱ्यांवर कारवाई केल्याची माहिती त्यांनी दिली. कुंटूर गावात अनेक वर्षांपासून अवैध ताडी व देशी दारू विक्रीचा व्यवसाय खुलेआम सुरू असल्याची चर्चा असून याबाबत राज्य उत्पादन शुल्क विभाग आणि स्थानिक पोलीस प्रशासन इतके दिवस मौन का बाळगून होते. असा सवाल नागरिकांकडून उपस्थित केला जात आहे. स्थानिक पोलिसांना हा सुरू असलेला अवैध व्यवसाय माहीत नव्हता काय ? असा प्रश्नही जनतेतून विचारला जात आहे. दरम्यान, गावातील काही नागरिकांनी तक्रार केल्यानंतरच उत्पादन शुल्क विभागाने कारवाई केल्यामुळे ही कारवाई केवळ तक्रारीचे निराकरण करण्यापुरती औपचारिकता तर नाही ना ? अशीही चर्चा कुंटूर परिसरात रंगू लागली आहे. नागरिकांनी या प्रकरणात सातत्याने कारवाई करून अवैध दारू विक्री पूर्णपणे बंद करण्याची मागणी केली आहे.
