नायगाव | बाळासाहेब पांडे
श्रावण महिन्याचे पवित्र औचित्य साधत, श्री शंभो ग्रुप नायगाव बाजार यांच्या वतीने दिनांक ३ ऑगस्ट २०२५ (रविवार) रोजी भव्य १०८ कावड यात्रेचे आयोजन करण्यात आले आहे. ही यात्रा श्रीक्षेत्र गोदावरी गंगा बळेगाव येथून सुरुवात होऊन, श्री महादेव मंदिर, गंगणबीड येथे गंगाजल महाअभिषेकाने संपन्न होणार आहे.
श्रावण महिन्यात कावड यात्रा ही श्रद्धा, भक्ती आणि संयमाचे प्रतीक मानली जाते. कावडीद्वारे गंगाजल आणून शिवलिंगावर अभिषेक केल्यास मनोकामना पूर्ण होते, अशी श्रद्धा आहे. कावड म्हणजे केवळ पाण्याची वाहतूक नव्हे, तर ती भक्ताच्या मनातील शिवप्रेमाची झुळूक असते. त्यात भाविकांचा निष्ठेचा ओघ असतो, आणि शरीर, मन, आत्मा यांचे एकात्म साधले जाते.
या यात्रेमध्ये श्री शंभो महादेवाच्या कृपेने व सद्गुरू मन्ना महाराज कोलंबीकर यांच्या आशीर्वादाने दररोज गंगाजल आणून महादेवाचा महाअभिषेक करण्यात येतो. यंदा ही परंपरा अधिक भव्य रूपात साजरी होत असून, १०८ कावडींचे विशेष आयोजन करण्यात आले आहे.
यात्रेची सुरुवात सकाळी ५.३० वाजता गोदावरी गंगा बळेगाव येथून होईल. संपूर्ण कावड सोहळ्याचे आयोजन श्री शंभो ग्रुप नायगाव बाजार तर्फे करण्यात आले आहे. आयोजकांनी भाविक भक्तांना मोठ्या संख्येने सहभागी होण्याचे आवाहन केले आहे, जेणेकरून हा अध्यात्मिक आणि भक्तिपूर्ण अनुभव सर्वांसाठी संस्मरणीय ठरेल.
या पवित्र यात्रेत सहभागी होऊन पुण्यप्राप्तीचा लाभ घ्यावा, असे आवाहन श्री शंभो ग्रुप चे अध्यक्ष विश्वनाथ मेडेवार, उपाध्यक्ष अविनाश चालीकवार, माधव कल्याण, नरेश गदेवार, साईराम कोटावार, सिद्धेश्वर सुताडे तसेच मार्गदर्शक धनंजय कवटीवार, आशिष गोरठेकर, मनोज डोंगळीकर व संपूर्ण नायगाव बाजार वतीने करण्यात आले आहे.
